काठमाडौं, चैत्र १९ ।
प्रधानमन्त्री केपी शर्मा ओलीको ठाडो आदेशपछि स्वास्थ्य तथा जनसंख्या मन्त्रालयले कोभिड-१९ को रोकथाम तथा नियन्त्रणका लागि अत्यावश्यक स्वास्थ्य सामग्री ल्याउन ओम्नी समूहसँग गरेको सम्झौता रद्द गरेको खुलासा भएको छ ।
प्रधानमन्त्री केपी शर्मा ओलीले स्वास्थ्य सामग्री खरिदमा ठूलो आर्थिक चलखेल भएको यथार्थ जानकारी पाएपछि स्वास्थ्य तथा जनसंख्यामन्त्री भानुभक्त ढकाललाई तत्काल सम्झौता रद्द गर्न ठाडो आदेश दिएका थिए ।
प्रधानमन्त्रीको ठाडो आदेशसँगै स्वास्थ्य मन्त्रालयले बुधबार पत्रकार सम्मेलन गरी ओम्नी समूहसँग भएको सम्झौता रद्द गरिएको जानकारी दिएको थियो ।
स्वास्थ्य सेवा विभागका महानिर्देशक महेन्द्रप्रसाद श्रेष्ठले ‘हामीले दिएको समय ३० तारेखभित्र उहाँले १० प्रतिशत हाराहारी मात्रै सामान ल्याउनुभयो’, उनले भने, ‘भोलि दिनुपर्ने सामान पनि दिन सक्ने कुनै छाटकाट देखिएन । त्यसैले सम्झौता रद्द गरेर धरौटी जफत गर्ने र कालोसूचीको प्रक्रिया अगाडि बढाउने निर्णय भएको छ ।’
साथै, तोकिएको समयमा ल्याउँछु भनेका सामग्री ल्याउन नसकेको र ल्याएका सामग्री पनि कमसल ल्याएको भन्दै मन्त्रालयले धरौटी वापत राखेको ५ करोड रुपैयाँ जफत गर्ने र कम्पनी कालोसूचीमा राख्न कम्पनी रजिष्टारमा पठाउने भएको छ ।
हालैमात्र मन्त्रालयले ओम्नीसँग कोभिड-१९ को रोकथाम तथा नियन्त्रणका लागि अत्यावश्यक सामग्री चीनबाट सप्लाई गर्न ओम्नीसँग सम्झौता गरेको थियो । तर, ओम्नीले ल्याएका सामानको गुणस्तरलगायतका विषयमा प्रश्न उठेको थियो ।
महानिर्देशक श्रेष्ठले भोलिदेखि नयाँ प्रक्रिया सुरु गर्ने बताउँदैं तीन दिनको सूचना निकालिने बताए । ‘सस्तोमा निवेदन दिन सबैलाई आग्रह गर्छु,’ उनले भने, ‘बढीमा ५ दिनभित्र ल्याउने गरी सम्झौता गर्छौ र त्यही अनुसार सामान उपलब्ध गराउँछौं ।’
उनले स्वास्थ्य सेवा विभागले आवश्यक सामग्री अस्पताल र स्वास्थ्य संस्थालाई उपलब्ध गराउने बताउँदै ढुक्क भएर बिरामीहरुको उपचार गर्न आग्रह गरे ।
